وامتحنت رياضه واه من الرياضه

بجد النهارده اول يوم احس فعلا بالفشل الفظيع ده من اول ابتدائى وانا الحمد لله بحب كتابى وبذاكر بضمير وانا كنت مذاكر والله جامد جدا ودخلت اللجنه عارف انى هخرج جايب جيد جدا دخلت اللجنه وخدت ورقه الاسئله بصيت فيها اه فى حاجات كتير عارفها وجيت احل كل حاجه دخلت فى بعضها قوانين التكامل مع التفاضل كله كله فى بعضه مبقتش عارف احل ازاى بقيت احل المساله واجى عند جزء معين واقف على كده ومعرفش اكمل بجد احساس فظيع انك تبقى مذاكر وتلاقى نفسك فجأه مش عارف اى حاجه ده انا هنافس اينشتاين فى وضع القوانين باللى انا كتبته فى الورقه حاجات عجيبه ربنا يستر بقى ود/عبد القوى (اسم على مسمى اصله استقوى علينا فى الامتحان ) يرأف بحالنا فى التصحيح ويخلى عنده شويه شفقه او رحمه انا لو كنت بعرف اعيط كنت عيطت على اللى حصلى فى الامتحان يلا بقى ربنا يستر ونعدى السنه دى يا رب شكلى مش هسيب مدرج فهمى طلبه ده ابد على العموم

ربنا يستررررررررررررررر يارب وسلام عليكم ورحمه الله وبركاته

وعدتكم انى اجيب لكم شعر مع الاحتفاظ بحقوق الملكيه الفكريه فيه ودى قصيده للشاعر الكبير اللى انا شخصيا بموت فيه
فاروق جويده الانسان الحساس والفنان المعبر بجد الراجل ده ملوش مثيل واسيبكم مع القصيده

فى عينيك عنوانى

وقالت : سوف تنسانى
وتنسى أننى يوماً
وهبتك نبض وجدانى
وتعشق موجة أخرى
و تهجر دفء شطآنى
وتجلس مثلما كنا
لتسمع بعض ألحانى
و لا تعنيك أحزانى
و يسقط كامنى اسمى
و سوف يتوه عنوانى
ترى .. ستقول يا عمرى
بأنك كنت تهوانى ؟!!



فقلت : هواك إيمانى
ومغفرتى وعصيانى
أتيتك والمنى عندى
بقايا بين أحضانى
ربيع مات طائره
على أنقاض بستان
رياح الحزن تعصرنى
وتسخر بين وجدانى
أحبكِ واحة هدأت
عليها كل أحزانى
أحبكِ نسمة تروى
لصمت الناس .. ألحانى
أحبكِ نشوة تسرى
وتشعل نار بركانى
أحبكِ انتِ يا أملاً
كضوء الصبح يلقانى
أماتَ الحب عشاقا
وحبكِ انتِ أحيانى
و لو خيرت فى وطن
لقلت : هواكِ أوطانى
و لو انساكى يا عمرى
حنايا القلب .. تنسانى
إذا ما ضعت فى درب
ففى عينيك .. عنوانى

وبدأت الامتحانات اه وقع المحظور

انا بكتبلكم النهارده والمفروض انى ادخل اذاكر ماث او رياضه دلوقتى لانى المفروض ان امتحان الرياضه يوم السبت يوم24/5 وشكل اليوم ده هيكون اول يوم احس فيه بالفشل لانى فعلا مش عارف اى حاجه فى الماث ربنا يستر ونعدى يا ريتنى كنت بحضر المحاضرات لكن تصوروا لم احضر من محاضرات الرياضه الا محاضره واحده او اتنين ومحضرتش الباقى اكيد هتقولو عليا دلوقتى انى فاشل لكن لا ده مش فشل ده كسل لان المحاضره كانت بتبدأ الساعه 9 وعلشان اخرج من بيتنا واوصل فى ميعاد المحاضره المفروض انى اخرج الساعه 7 ايوه 7 لان المواصلات من بيتنا لغايه الجامعه بتاخد ساعتين وممكن اكتر كمان لو الطريق كان واقف وهو على طول واقف والمرور زحمه وعلشان اخرج الساعه 7 لازم كنت اقوم من النوم الساعه 6 او 5.30 وده مستحيل طبعا لانى بنام اصلا الساعه 4 او3 الفجر فا مكنتش بحضر ماث وكنت بعمل كده برده فى الترم الاول بس الحمد لله عديت فى الترم الاول وجبت فى الرياضه مقبول لكن ةالتقدير العام كان جيد الحمد لله ادعولى يا ريت اعرف اعمل حاجه فى الامتحان لان يوم الامتحان يكرم المرء او يهان وانا شكلى هتهان اهانه ملهاش مثيل ربنا يستر بجد ادعولى ياريت انا وكل شباب حاسبات ومعلومات جامعه عين شمس وقولو يارب نعدى من الماث والالكترونكس يارب وهكتبلكم بقى تانى بعد الامتحان اقولكم عملت ايه سلام دلوقتى لان ليا نفس اذاكر سلام

اهلا بيكم على ارض الياس

اهلا بيكم كلكم فى مدونتى ارض اليأس انا عارف انكم هتستغربو من الاسم بس ده فعلا شعورى دلوقتى وغالبا ده الشعور المسيطر عليا على طول وكمان الامتحانات جت علشان تزود الشعور ده انا اول مره اعمل مدونه وفكرت فيها يمكن اطلع همومي فى الكتابة فى المدونه وان شاء الله احاول اقدملكم حاجه تحبوها كلكم والسلام عليكم ورحمه الله وبركاته اه صح نسيت انا برده بحب الشعر جدا بس الشعر اللي هحطه فى المدونة طبعا مش انا اللي هكون كاتبه انا ممكن اكتب بقيه المواضيع اسمحولى انى انقله مع الاحتفاظ بحقوق الملكيه الفكريه وشكرا ليكم واتمنى ان شغلى ان شاء الله يعجبكم
والسلام عليكم ورحمه الله وبركات